Fact Check: ಸೋದರ ಸಂಬಂಧಿಯನ್ನೇ ಮದುವೆಯಾಗುವ ವಿಚಾರವಾಗಿ ಮುಸ್ಲಿಂ ಮಹಿಳೆಯನ್ನು ಸಮಯ್ ರೈನಾ ಲೇವಡಿ ಮಾಡಿದ್ದಾರೆಯೇ? ಇಲ್ಲ, ಇದು ಹಾಸ್ಯ ನಾಟಕದ ಪಾತ್ರ

ಸಮಯ್ ರೈನಾ ಅವರ ಹಾಸ್ಯ ಕಾರ್ಯಕ್ರಮದಲ್ಲಿ ಮುಸ್ಲಿಂ ಸಮುದಾಯದಲ್ಲಿ ಸೋದರ ಸಂಬಂಧಿಗಳ ನಡುವೆ ನಡೆಯುವ ವಿವಾಹದ ವಿಚಾರವಾಗಿ ಮುಸ್ಲಿಂ ಯುವತಿಯೊಬ್ಬಳನ್ನು ಲೇವಡಿ ಮಾಡಲಾಗಿದೆ ಎಂಬ ಹೇಳಿಕೆಯೊಂದಿಗೆ ವಿಡಿಯೊವೊಂದು ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ.
Fact Check: ಸೋದರ ಸಂಬಂಧಿಯನ್ನೇ ಮದುವೆಯಾಗುವ ವಿಚಾರವಾಗಿ ಮುಸ್ಲಿಂ ಮಹಿಳೆಯನ್ನು ಸಮಯ್ ರೈನಾ ಲೇವಡಿ ಮಾಡಿದ್ದಾರೆಯೇ? ಇಲ್ಲ, ಇದು ಹಾಸ್ಯ ನಾಟಕದ ಪಾತ್ರ
Published on: 
2 min read

ಸಮಯ್ ರೈನಾ ಅವರ ಹಾಸ್ಯ ಕಾರ್ಯಕ್ರಮದಲ್ಲಿ ಮುಸ್ಲಿಂ ಸಮುದಾಯದಲ್ಲಿ ಸೋದರ ಸಂಬಂಧಿಗಳ ನಡುವೆ ನಡೆಯುವ ವಿವಾಹದ ವಿಚಾರವಾಗಿ ಮುಸ್ಲಿಂ ಯುವತಿಯೊಬ್ಬಳನ್ನು ಲೇವಡಿ ಮಾಡಲಾಗಿದೆ ಎಂಬ ಹೇಳಿಕೆಯೊಂದಿಗೆ ವಿಡಿಯೊವೊಂದು ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ.

ವೈರಲ್ ವಿಡಿಯೊದಲ್ಲಿ ಏನಿದೆ?

ವೈರಲ್ ವಿಡಿಯೊದಲ್ಲಿ ‘ಇಂಡಿಯಾಸ್ ಗಾಟ್ ಲೇಟೆಂಟ್’ ಕಾರ್ಯಕ್ರಮದ ದೃಶ್ಯವಿದೆ. ಈ ಕಾರ್ಯಕ್ರಮದಲ್ಲಿ ಹಾಸ್ಯನಟ ಸಮಯ್ ರೈನಾ ಮತ್ತು ನಟಿ ಹುಮಾ ಖುರೇಷಿ ತೀರ್ಪುಗಾರರಾಗಿ ಕಾಣಿಸಿಕೊಂಡಿದ್ದಾರೆ. ವೇದಿಕೆಯ ಮೇಲಿರುವ ಮಹಿಳಾ ಸ್ಪರ್ಧಿಯೊಬ್ಬರು ಗುಲಾಬಿ ಮತ್ತು ನೀಲಿ ಬಣ್ಣದ ಸಲ್ವಾರ್ ಕಮೀಜ್ ಧರಿಸಿದ್ದು, ತಲೆಯ ಮೇಲೆ ನೀಲಿ ದುಪಟ್ಟಾ ಹಾಕಿಕೊಂಡಿದ್ದಾರೆ.

ಸಂಭಾಷಣೆಯ ಸಂದರ್ಭದಲ್ಲಿ ಸಮಯ್ ರೈನಾ ಅವರು ‘ಸಲ್ಮಾ ದೀವಾನಿ’ ಎಂದು ಕರೆಯುವ ಸ್ಪರ್ಧಿಯನ್ನು ಒಬ್ಬರೇ ಬಂದಿದ್ದೀರಾ ಎಂದು ಕೇಳುತ್ತಾರೆ. ಅದಕ್ಕೆ ಆಕೆ ತಾನು ಒಬ್ಬಳೇ ಬಂದಿರುವುದಾಗಿ, ಆದರೆ ತನ್ನ ಸೋದರ ಸಂಬಂಧಿಯೊಬ್ಬರು ಜೊತೆಯಲ್ಲಿ ಬಂದಿದ್ದಾರೆ ಎಂದು ಉತ್ತರಿಸುತ್ತಾರೆ. ಆಗ ಹುಮಾ ಖುರೇಷಿ ಅವರು ಆ ಸೋದರ ಸಂಬಂಧಿ ಯಾರು ಎಂದು ಪ್ರಶ್ನಿಸುತ್ತಾರೆ. ಅದಕ್ಕೆ ಸಮಯ್ ರೈನಾ ತಮಾಷೆಯಾಗಿ ‘ಆಕೆಯ ಗಂಡ’ ಎಂದು ಉತ್ತರಿಸುತ್ತಾರೆ.

ಭಾರತ, ಪಾಕಿಸ್ತಾನ ಮತ್ತು ಬಾಂಗ್ಲಾದೇಶದ ಕೆಲವು ಮುಸ್ಲಿಂ ಸಮುದಾಯಗಳಲ್ಲಿ ಸೋದರ ಸಂಬಂಧಿಗಳ ನಡುವೆ ನಡೆಯುವ ವಿವಾಹ ಪದ್ಧತಿಯ ಹಿನ್ನೆಲೆಯಲ್ಲಿ ಈ ಹಾಸ್ಯಮಯ ಹೇಳಿಕೆ ನೀಡಲಾಗಿದೆ.

ಹಲವು ಬಳಕೆದಾರರು ಈ ವಿಡಿಯೊವನ್ನು ಹಂಚಿಕೊಂಡಿದ್ದು, ‘‘24 ಕೋಟಿ ಕತ್ತರಿಸಿದ ಮೆಣಸಿನಕಾಯಿಗಳ (ಅರ್ಥಾತ್, ಅತಿಯಾದ ಮಾತುಗಳ) ಮರ್ಯಾದೆಯನ್ನೇ ಸಂಪೂರ್ಣವಾಗಿ ಹರಾಜು ಹಾಕಿದ್ದಾರೆ. ಹೈದರಾಬಾದ್‌ನ ಸಲಾಮಾ ದಿವಾಣಿ ಎಂಬವರು ಇಂಡಿಯಾಸ್ ಗಾಟ್ ಲೇಟ್ ಎಂಬ ಕಾರ್ಯಕ್ರಮಕ್ಕೆ ಹೋಗಿದ್ದರು. ಸಮಯ್ ರೈನಾ: "ಸಲಾಮಾ ದಿವಾಣಿ, ನಿಮ್ಮ ಜೊತೆ ಯಾರು ಬಂದಿದ್ದಾರೆ...?" ಸಲಾಮಾ: "ನನ್ನ ಕಸಿನ್ (ಸಂಬಂಧಿ) ಬಂದಿದ್ದಾರೆ." ಹುಮಾ ಖುರೇಷಿ: "ಯಾರವರು ಕಸಿನ್...?" ಸಮಯ್ ರೈನಾ: "ಅವರು ಬಹುಶಃ ಪತಿಯಾಗಿರಬಹುದು; ಅಣ್ಣ, ತಮ್ಮ, ತಂದೆ, ತಮ್ಮನ ಮಗ, ದೊಡ್ಡಪ್ಪನ ಮಗ - ಹೀಗೆ ಯಾವುದೇ ವ್ಯತ್ಯಾಸವಿಲ್ಲದೆ ಮದುವೆಯಾಗಿರಬಹುದು." - ಹೀಗೆ ನೇರವಾಗಿ ಹೇಳಿಬಿಟ್ಟರು. ಸಮಯ್ ರೈನಾ ಎಲ್ಲರ ಮಾನವನ್ನೂ ಹರಾಜು ಹಾಕಿಬಿಟ್ಟರು’’ ಎಂದು ಬರೆದುಕೊಂಡಿದ್ದಾರೆ. (Archive)

Fact Check

ಸೌತ್ ಚೆಕ್ ನಡೆಸಿದ ಪರಿಶೀಲನೆಯಲ್ಲಿ ವೈರಲ್ ಹೇಳಿಕೆ ಸುಳ್ಳು ಎಂಬುದು ತಿಳಿದುಬಂದಿದೆ. ವಿಡಿಯೊದಲ್ಲಿ ಭಾಗ್ಯಶ್ರೀ ತಾರ್ಕೆ ಎಂಬ ಯುವತಿ ‘ಸಲ್ಮಾ ದೀವಾನಿ’ ಎಂಬ ಮುಸ್ಲಿಂ ಮಹಿಳೆಯ ಪಾತ್ರವನ್ನು ನಿರ್ವಹಿಸುತ್ತಿರುವುದು ಕಂಡುಬಂದಿದೆ.

ವಿಡಿಯೊದಲ್ಲಿರುವ ಮಹಿಳೆ ಯಾರು?

ವೇದಿಕೆಯ ಮೇಲಿರುವ ಮಹಿಳೆಯನ್ನು ರಂಗಭೂಮಿ ಕಲಾವಿದೆ ಭಾಗ್ಯಶ್ರೀ ತಾರ್ಕೆ ಎಂದು ಗುರುತಿಸಿದ್ದೇವೆ.

2025ರ ಮಾರ್ಚ್ 6ರಂದು ‘ದಿ ಹಿಂದೂ’ ಪತ್ರಿಕೆಯಲ್ಲಿ ಪ್ರಕಟವಾದ ವರದಿಯ ಪ್ರಕಾರ, ತಾರ್ಕೆ ಹೈದರಾಬಾದ್ ಮೂಲದ ನಟಿ ಮತ್ತು ರಂಗಭೂಮಿ ಕಲಾವಿದೆ. ಅವರು ದೆಹಲಿಯ ರಾಷ್ಟ್ರೀಯ ನಾಟಕ ಶಾಲೆಯ (ಎನ್‌ಎಸ್‌ಡಿ) ಹಳೆಯ ವಿದ್ಯಾರ್ಥಿನಿಯಾಗಿದ್ದು, ಈ ಹಿಂದೆ ಮುದ್ರಣ ಮಾಧ್ಯಮದಲ್ಲಿ ಪತ್ರಕರ್ತೆಯಾಗಿಯೂ ಕೆಲಸ ಮಾಡಿದ್ದಾರೆ.

ಕಾರ್ಯಕ್ರಮದಲ್ಲಿ ಅವರು ಯಾವ ಪಾತ್ರ ನಿರ್ವಹಿಸಿದ್ದರು?

ಭಾಗ್ಯಶ್ರೀ ತಾರ್ಕೆ ಅವರು ‘ಸಲ್ಮಾ ದೀವಾನಿ’ ಎಂಬ ಪಾತ್ರವನ್ನು ಸೃಷ್ಟಿಸಿ, ಅದನ್ನು ಸ್ವತಃ ನಿರ್ವಹಿಸಿದ್ದಾರೆ. ಸಲ್ಮಾ ಹೈದರಾಬಾದ್ ಶೈಲಿಯ ಭಾಷೆಯಲ್ಲಿ ಮಾತನಾಡುವ ಮಹಿಳೆಯಾಗಿದ್ದು, ಸಲ್ಮಾನ್ ಖಾನ್ ಅವರ ಅಭಿಮಾನಿಯಾಗಿದ್ದಾರೆ. ಸಲ್ಮಾ ಹೈದರಾಬಾದ್‌ನ ವಿವಾಹಿತ ಮಹಿಳೆಯಾಗಿದ್ದು, ಇಬ್ಬರು ಮಕ್ಕಳಿದ್ದಾರೆ. ಆಕೆಯ ಪತಿ ಗಲ್ಫ್ ರಾಷ್ಟ್ರದಲ್ಲಿ ಕೆಲಸ ಮಾಡುತ್ತಿದ್ದು, ಮನೆಗೆ ಹಣ ಕಳುಹಿಸುತ್ತಾರೆ. ಒಂಟಿತನ ಮತ್ತು ದೈನಂದಿನ ಜೀವನದ ಸಮಸ್ಯೆಗಳನ್ನು ಎದುರಿಸುತ್ತಲೇ ಆಕೆ ಮನೆಯ ಜವಾಬ್ದಾರಿಗಳನ್ನು ನಿರ್ವಹಿಸುತ್ತಾಳೆ.

ನಾವು ತಾರ್ಕೆ ಅವರ ಇನ್‌ಸ್ಟಾಗ್ರಾಮ್ ಖಾತೆಯನ್ನು ಪತ್ತೆಹಚ್ಚಿದ್ದೇವೆ. ಅದರಲ್ಲಿ ಅವರು ರೈನಾ ಅವರ ಕಾರ್ಯಕ್ರಮದ ಫೋಟೊವನ್ನೇ ತಮ್ಮ ಪ್ರೊಫೈಲ್ ಚಿತ್ರವಾಗಿ ಬಳಸಿದ್ದಾರೆ. ಕಾರ್ಯಕ್ರಮದ ಕೆಲವು ವಿಡಿಯೊ ತುಣುಕುಗಳನ್ನೂ ಹಂಚಿಕೊಂಡಿದ್ದಾರೆ.

ಅವರ ಪ್ರೊಫೈಲ್‌ನಲ್ಲಿ ‘ಸಲ್ಮಾ ದೀವಾನಿ’ ಪಾತ್ರವನ್ನು ನಿರ್ವಹಿಸುವ ನಟಿ ತಾವೇ ಎಂಬುದನ್ನು ಉಲ್ಲೇಖಿಸಲಾಗಿದೆ. ಅಲ್ಲದೆ, ನಾಟಕದ ಟಿಕೆಟ್‌ಗಳನ್ನು ಕಾಯ್ದಿರಿಸಲು ಕೊಂಡಿಗಳನ್ನೂ ನೀಡಲಾಗಿದೆ. ಅವರು ಇತರ ರಂಗಭೂಮಿ ನಾಟಕಗಳಲ್ಲಿಯೂ ಅಭಿನಯಿಸುತ್ತಾರೆ.

ಸಲ್ಮಾ ದೀವಾನಿ ಎಂಬುದು ಅವರು ನಿರ್ವಹಿಸಿರುವ ಹಲವು ಪಾತ್ರಗಳಲ್ಲಿ ಒಂದಾಗಿದೆ. ಈ ಪಾತ್ರದ ಮೂಲಕ ಹೈದರಾಬಾದ್‌ನ ಒಂಟಿತನ ಅನುಭವಿಸುತ್ತಿರುವ ಮುಸ್ಲಿಂ ಮಹಿಳೆಯ ಜೀವನವನ್ನು ಹಾಸ್ಯಮಯವಾಗಿ ಪ್ರಸ್ತುತಪಡಿಸಿದ್ದಾರೆ.

‘ತಾರ್ಕೆ’ ಎಂಬ ಉಪನಾಮವು ಮುಖ್ಯವಾಗಿ ಮಹಾರಾಷ್ಟ್ರದ ಮರಾಠ ಸಮುದಾಯದೊಂದಿಗೆ ಸಂಬಂಧ ಹೊಂದಿದ್ದು, ಈ ಸಮುದಾಯದಲ್ಲಿ ಬಹುಪಾಲು ಹಿಂದೂಗಳಿದ್ದಾರೆ. ಉಪನಾಮಗಳ ಮಾಹಿತಿಯನ್ನು ಒದಗಿಸುವ iMeUsWe ದತ್ತಾಂಶದ ಪ್ರಕಾರ, ಈ ಉಪನಾಮವು ಹಿಂದೂ ಮರಾಠ ಸಮುದಾಯದೊಂದಿಗೆ ಸಂಬಂಧ ಹೊಂದಿದೆ.

ವೈರಲ್ ವಿಡಿಯೊದಲ್ಲಿ ರಂಗಭೂಮಿ ಕಲಾವಿದೆಯೊಬ್ಬರು ‘ಇಂಡಿಯಾಸ್ ಗಾಟ್ ಲೇಟೆಂಟ್’ ಕಾರ್ಯಕ್ರಮದಲ್ಲಿ ತಮ್ಮ ಕಾಲ್ಪನಿಕ ಪಾತ್ರವಾದ ಸಲ್ಮಾ ದೀವಾನಿಯಾಗಿ ಕಾಣಿಸಿಕೊಂಡಿದ್ದಾರೆ. ಈ ವಿಡಿಯೊದಲ್ಲಿ ಮುಸ್ಲಿಂ ಮಹಿಳೆಯೊಬ್ಬರು ತಮ್ಮ ವೈಯಕ್ತಿಕ ಅನುಭವಗಳನ್ನು ಹಂಚಿಕೊಳ್ಳುತ್ತಿರುವುದಾಗಲಿ ಅಥವಾ ಮುಸ್ಲಿಂ ಸಮುದಾಯದ ಪರವಾಗಿ ಮಾತನಾಡುತ್ತಿರುವುದಾಗಲಿ ತೋರಿಸಲಾಗಿಲ್ಲ.

ಹೆಚ್ಚಿನ ಸ್ಪಷ್ಟನೆಗಾಗಿ ನಾವು ತಾರ್ಕೆ ಅವರನ್ನು ಸಂಪರ್ಕಿಸಿದ್ದೇವೆ. ಅವರಿಂದ ಪ್ರತಿಕ್ರಿಯೆ ಬಂದ ಬಳಿಕ ಈ ಫ್ಯಾಕ್ಟ್‌ಚೆಕ್ ವರದಿಯನ್ನು ನವೀಕರಿಸಲಾಗುವುದು.

ತೀರ್ಮಾನ: ವೈರಲ್ ವಿಡಿಯೊದೊಂದಿಗೆ ಹಂಚಿಕೊಳ್ಳಲಾಗುತ್ತಿರುವ ಹೇಳಿಕೆ ಸುಳ್ಳು ಎಂಬ ತೀರ್ಮಾನಕ್ಕೆ ಬಂದಿದ್ದೇವೆ.