హైదరాబాద్: ఓటర్ల జాబితాల స్పెషల్ ఇంటెన్సివ్ రివిజన్ (SIR)కు సంబంధించిన ఆరోపణల నేపథ్యంలో చీఫ్ ఎలక్షన్ కమిషనర్ జ్ఞానేశ్ కుమార్కు వ్యతిరేకంగా సెప్టెంబర్ 25న ఢిల్లీలో నిరసనలు జరిగాయి.
ఢిల్లీ కాంగ్రెస్ ఎన్నికల సంఘం కార్యాలయం వరకు ర్యాలీ నిర్వహించి, జ్ఞానేశ్ కుమార్ రాజీనామా చేయాలని, SIR ప్రక్రియపై స్వతంత్ర ఆడిట్ నిర్వహించాలని డిమాండ్ చేసింది. తెలంగాణ, కోల్కతాలో కూడా జ్ఞానేశ్ కుమార్కు వ్యతిరేకంగా నిరసనలు జరిగినట్లు వార్తలు వచ్చాయి.
ఈ నేపథ్యంలో ఈ నిరసనలకు సంబంధించిన పలు దృశ్యాలు సోషల్ మీడియాలో వైరల్ అవుతున్నాయి. అందులో ఓ వీడియో ఢిల్లీలో జ్ఞానేశ్ కుమార్కు వ్యతిరేకంగా జరిగిన నిరసనను చూపిస్తోందంటూ ఫేస్బుక్లో షేర్ చేశారు.
వీడియోలో ఓ రోడ్డుపై పెద్ద సంఖ్యలో ప్రజలు గుమిగూడి కనిపిస్తారు. పలువురు మొబైల్ ఫోన్లు పైకి ఎత్తి, పిడికిళ్లు పైకి లేపుతూ, జెండాలు ఊపుతూ నినాదాలు చేస్తున్నారు.
ఓ ఫేస్బుక్ యూజర్ ఈ వీడియోను “గ్యానేష్ కుమార్ రాజీనామా చేయాలి SIR ను రద్దు కోరుతూ ధర్నా. జంతర్ మంతర్ వద్ద జన సునామీ. ఈవీఎం హటావు ఉద్యమం. వానలో సైతం పాల్గొన్న వేలాది ప్రజలు...” అంటూ షేర్ చేశారు. (ఆర్కైవ్)
సౌత్ చెక్ పరిశీలనలో ఈ క్లెయిమ్ తప్పని తేలింది. 2024లో ఢిల్లీలోని జంతర్ మంతర్ వద్ద జరిగిన ఈవీఎం వ్యతిరేక నిరసనకు సంబంధించిన వీడియోను జ్ఞానేశ్ కుమార్కు వ్యతిరేకంగా ఇటీవల జరిగిన నిరసనగా తప్పుడు క్లెయిమ్తో షేర్ చేస్తున్నారు.
వైరల్ వీడియోలోని కీలక ఫ్రేమ్లపై రివర్స్ ఇమేజ్ సెర్చ్ నిర్వహించగా, ‘A.K. Stalin’ అనే యూజర్ ఈ వీడియోను ఫిబ్రవరి 1, 2024న Xలో పోస్ట్ చేసినట్లు గుర్తించాం. ఆ పోస్ట్లోని క్యాప్షన్ ప్రకారం, ఇది ఈవీఎంలకు వ్యతిరేకంగా జరిగిన నిరసనకు సంబంధించిన వీడియో.
వీడియో 2024 నాటిది
అమర్ ఉజాలా జనవరి 31, 2024న ప్రచురించిన కథనం ప్రకారం, భారత్ ముక్తి మోర్చా, రాష్ట్రీయ కిసాన్ మోర్చా, బహుజన్ ముక్తి పార్టీ సహా 22 సంస్థలు ఢిల్లీలోని జంతర్ మంతర్ వద్ద ఈవీఎంలకు వ్యతిరేకంగా నిరసన నిర్వహించాయి.
పలు రాష్ట్రాల నుంచి వచ్చిన నిరసనకారులు ఈవీఎంలను తొలగించి, తిరిగి బ్యాలెట్ పేపర్ల విధానాన్ని తీసుకురావాలని డిమాండ్ చేశారు.
అదే రోజు SabrangIndia ప్రచురించిన కథనంలో ఈ నిరసనకు సంబంధించిన ఫొటో కనిపించింది. అందులోని దృశ్యాలు వైరల్ వీడియోలోని దృశ్యాలతో సరిపోలాయి. రెండు దృశ్యాల్లోనూ కనిపించిన ఆకుపచ్చ రంగు బోర్డును గమనించాం. దీంతో అవి ఒకే ప్రాంతానికి సంబంధించినవని నిర్ధారించాం.
అదే నిరసనపై జనవరి 31, 2024న ‘O Heraldo Goa’ అనే యూట్యూబ్ ఛానల్ ప్రచురించిన వీడియో రిపోర్ట్లో కూడా ఇదే బ్యానర్ కనిపించింది.
అందువల్ల, వైరల్ వీడియో సెప్టెంబర్ 2026లో జ్ఞానేశ్ కుమార్కు వ్యతిరేకంగా ఢిల్లీలో జరిగిన నిరసనకు సంబంధించినది కాదు. ఇది జనవరి 2024లో జంతర్ మంతర్ వద్ద జరిగిన ఈవీఎం వ్యతిరేక నిరసనకు సంబంధించిన పాత వీడియో.
కాబట్టి, క్లెయిమ్ తప్పు.
