Fact Check: ಭೋಪಾಲ್ನಲ್ಲಿ 'ಪಾಕ್ ಜಿಂದಾಬಾದ್' ಘೋಷಣೆ ಕೂಗಿದವರನ್ನು ಪೊಲೀಸರು ಥಳಿಸಿ ಮೆರವಣಿಗೆ ಮಾಡಿದ್ದಾರೆಯೇ?
ಕೆಲವರು ಹರಿದ ಬಟ್ಟೆಗಳನ್ನು ಧರಿಸಿದ ಗಾಯಗೊಂಡ ಪುರುಷರ ಗುಂಪನ್ನು ಪೊಲೀಸ್ ಅಧಿಕಾರಿಗಳು ಮೆರವಣಿಗೆ ಮಾಡುತ್ತಿರುವ ವೀಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿದೆ. ಭೋಪಾಲ್ನಲ್ಲಿ "ಪಾಕಿಸ್ತಾನ ಜಿಂದಾಬಾದ್" ಘೋಷಣೆಗಳನ್ನು ಕೂಗಿದ್ದಕ್ಕಾಗಿ ಇವರನ್ನು ಥಳಿಸಲಾಗಿದೆ ಎಂದು ಅನೇಕ ಬಳಕೆದಾರರು ಹೇಳಿಕೊಳ್ಳುತ್ತಿದ್ದಾರೆ.
ಫೇಸ್ಬುಕ್ ಬಳಕೆದಾರರೊಬ್ಬರು ಈ ವೀಡಿಯೊವನ್ನು ಹಂಚಿಕೊಂಡು, ‘‘ಭೋಪಾಲ್ ನಲ್ಲಿ ಪಾಕಿಸ್ತಾನ ಜಿಂದಾಬಾದ್ ಹೇಳಿದ ದೇಶದ್ರೋಹಿಗಳ ಬೆಂಡೆತ್ತಿದ ಭೋಪಾಲ್ ಪೋಲೀಸರು’’ ಎಂದು ಬರೆದುಕೊಂಡಿದ್ದಾರೆ. (Archive)
ಇದೇರೀತಿಯ ಹೇಳಿಕೆಯೊಂದಿಗೆ ವೈರಲ್ ಆಗುತ್ತಿರುವ ವೀಡಿಯೊವನ್ನು ನೀವು ಇಲ್ಲಿ, ಇಲ್ಲಿ ನೋಡಬಹುದು.
Fact Check:
ಈ ಸುದ್ದಿಯ ಸತ್ಯಾಸತ್ಯತೆಯನ್ನು ಸೌತ್ ಚೆಕ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವೀಡಿಯೊ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. ವೈರಲ್ ಆಗಿರುವ ವೀಡಿಯೊ ಭೂಪಾಲ್ ಪೊಲೀಸರು ದರೋಡೆಕೋರರನ್ನು ಮೆರವಣಿಗೆ ಮಾಡುತ್ತಿರುವುದನ್ನು ತೋರಿಸುತ್ತದೆ.
ನಿಜಾಂಶವನ್ನು ತಿಳಿಯಲು ವೈರಲ್ ವೀಡಿಯೊದ ಪ್ರಮುಖ ಚೌಕಟ್ಟುಗಳನ್ನು ಹಿಮ್ಮುಖವಾಗಿ ಹುಡುಕಿದಾಗ ಮೇ 12 ರಂದು ವಿಕೆ ನ್ಯೂಸ್ ಎಂಬ ಯೂಟ್ಯೂಬ್‌ನಲ್ಲಿ ಅಪ್‌ಲೋಡ್ ಮಾಡಲಾದ ಸುದ್ದಿ ವರದಿ ನಮಗೆ ಸಿಕ್ಕಿತು. ವರದಿಯ ಪ್ರಕಾರ, ‘‘ಕುಖ್ಯಾತ ದರೋಡೆಕೋರ ಜುಬೈರ್ ಮೌಲಾನಾ ಮತ್ತು ಅವನ ಮೂವರು ಸಹಚರರನ್ನು ಭೋಪಾಲ್ ಪೊಲೀಸರು ಬಂಧಿಸಿದ್ದಾರೆ. ಅವನ ವಿರುದ್ಧ 55 ಕ್ಕೂ ಹೆಚ್ಚು ಕ್ರಿಮಿನಲ್ ಪ್ರಕರಣಗಳು ದಾಖಲಾಗಿವೆ. ಭೋಪಾಲ್ನಲ್ಲಿ ಭೀತಿ ಮೂಡಿಸಲು ವಾಹನಗಳನ್ನು ಧ್ವಂಸಗೊಳಿಸಿ ಸಾರ್ವಜನಿಕವಾಗಿ ಗುಂಡು ಹಾರಿಸಿದ ಆರೋಪ ಅವನ ಮೇಲಿದೆ. ಪೊಲೀಸರು ಅವರಿಂದ ಅಕ್ರಮ ಬಂದೂಕುಗಳು ಮತ್ತು ಇತರ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಂಡಿದ್ದಾರೆ’’ ಎಂಬ ಮಾಹಿತಿ ಇದರಲ್ಲಿದೆ. ವೈರಲ್ ವೀಡಿಯೊದಲ್ಲಿರುವ ಅದೇ ದೃಶ್ಯವನ್ನು ಇದರಲ್ಲೂ ಕಾಣಬಹುದು.
ಈ ಘಟನೆಯ ಕುರಿತು ನಮಗೆ ಹಲವಾರು ಸುದ್ದಿ ವರದಿಗಳು ಕೂಡ ಸಿಕ್ಕಿವೆ. ನವ್ಭಾರತ್ ಟೈಮ್ಸ್, ಮೇ 9 ರಂದು ವೈರಲ್ ವೀಡಿಯೊದಲ್ಲಿನ ಸ್ಕ್ರೀನ್ ಶಾಟ್ನೊಂದಿಗೆ ಪ್ರಕಟಿಸಿದ ವರದಿಯ ಪ್ರಕಾರ, ‘‘ಭೋಪಾಲ್ನಲ್ಲಿ ಕುಖ್ಯಾತ ದರೋಡೆಕೋರ ಜುಬೈರ್ ಮೌಲಾನಾ ಮತ್ತು ಆತನ ಮೂವರು ಸಹಚರರನ್ನು ಪೊಲೀಸರು ಬಂಧಿಸಿದ್ದಾರೆ. ಈ ಬಂಧನ ಶುಕ್ರವಾರ ನಡೆದಿದೆ. ಹಲವಾರು ಪೊಲೀಸ್ ತಂಡಗಳು ಒಟ್ಟಾಗಿ ಈ ಕ್ರಮ ಕೈಗೊಂಡವು. ಜುಬೈರ್ ಮೌಲಾನಾ ಕಳೆದ ಆರು ತಿಂಗಳಿನಿಂದ ತಲೆಮರೆಸಿಕೊಂಡಿದ್ದ. ಅವನು ಇತ್ತೀಚೆಗೆ ತನ್ನ ಶತ್ರುಗಳನ್ನು ಹೆದರಿಸಲು ಎರಡು ಬಾರಿ ಗುಂಡು ಹಾರಿಸಿದ್ದನು. ಆರೋಪಿಗಳಿಂದ ಒಂದು ಅಕ್ರಮ ಆಯುಧ, ನಾಲ್ಕು ಸಜೀವ ಕಾರ್ಟ್ರಿಡ್ಜ್‌ಗಳು ಮತ್ತು ಮೂರು ಹರಿತವಾದ ಆಯುಧಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಪೊಲೀಸ್ ತಂಡ ಆರೋಪಿಯನ್ನು ಆ ಪ್ರದೇಶದ ಸುತ್ತಲೂ ಮೆರವಣಿಗೆ ಮಾಡಿ ಕರೆದುಕೊಂಡು ಹೋದರು’’ ಎಂದು ಬರೆಯಲಾಗಿದೆ.
ವೈರಲ್ ವೀಡಿಯೊದ ಸ್ಕ್ರೀನ್ ಶಾಟ್ನೊಂದಿಗೆ ಇದೇ ವರದಿಯನ್ನು ಮಾಡಿರುವ ಸುದ್ದಿಯನ್ನು ನೀವು ಇಲ್ಲಿ, ಇಲ್ಲಿ ನೋಡಬಹುದು. ಆದರೆ, ಯಾವುದೇ ಸುದ್ದಿ ವರದಿಯಲ್ಲಿ ಪಾಕಿಸ್ತಾನ ಅಥವಾ "ಪಾಕಿಸ್ತಾನ ಜಿಂದಾಬಾದ್" ಘೋಷಣೆಗಳ ಉಲ್ಲೇಖ ನಮಗೆ ಕಂಡುಬಂದಿಲ್ಲ.
ಹೀಗಾಗಿ, ಈ ಎಲ್ಲ ಮಾಹಿತಿಯ ಆಧಾರದ ಮೇಲೆ ವೈರಲ್ ಆಗಿರುವ ವೀಡಿಯೊ ಭೂಪಾಲ್ ಪೊಲೀಸರು ದರೋಡೆಕೋರರನ್ನು ಮೆರವಣಿಗೆ ಮಾಡುತ್ತಿರುವುದನ್ನು ತೋರಿಸುತ್ತದೆ ಮತ್ತು "ಪಾಕಿಸ್ತಾನ ಜಿಂದಾಬಾದ್" ಘೋಷಣೆಗಳಿಗೆ ಯಾವುದೇ ಸಂಬಂಧವಿಲ್ಲ ಎಂದು ನಾವು ಖಚಿತವಾಗಿ ಹೇಳುತ್ತೇವೆ.
