ಬಸ್ ಕಂಡಕ್ಟರ್ ಒಬ್ಬ ಮಹಿಳೆಗೆ ಕಿರುಕುಳ ನೀಡುತ್ತಿರುವುದನ್ನು ತೋರಿಸುವ ವೀಡಿಯೊವನ್ನು ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗುತ್ತಿದೆ. ಬಸ್ ಹತ್ತುವ ಮಹಿಳೆಯ ಹಿಂಭಾಗಕ್ಕೆ ಕಂಡಕ್ಟರ್ ಹೊಡೆಯುತ್ತಿರುವುದನ್ನು ಇದರಲ್ಲಿ ಕಾಣಬಹುದು. ಬಳಿಕ ಯುವಕನೊಬ್ಬ ಕಂಡಕ್ಟರ್‌ಗೆ ಮುಖಾಮುಖಿಯಾಗಿ ಹಲ್ಲೆ ಮಾಡುತ್ತಿರುವುದು ಕಂಡುಬರುತ್ತದೆ.
ಫೇಸ್ಬುಕ್ ಬಳಕೆದಾರರೊಬ್ಬರು ಈ ವೀಡಿಯೊವನ್ನು ಹಂಚಿಕೊಂಡು, ‘‘ಬಸ್ ಹತ್ತುವಾಗ ಮಹಿಳೆಯನ್ನು ಅಸಭ್ಯವಾಗಿ ಮುಟ್ಟಿದ ಬಸ್ ಕಂಡಕ್ಟರ್, ಅವನಿಗೆ ಪಾಠ ಕಲಿಸಿದ ವ್ಯಕ್ತಿ’’ ಎಂದು ಬರೆದುಕೊಂಡಿದ್ದಾರೆ. (Archive)
ಈ ಸುದ್ದಿಯ ಸತ್ಯಾಸತ್ಯತೆಯನ್ನು ಸೌತ್ ಚೆಕ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವೀಡಿಯೊ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. ಇದು ನಿಜವಾಗಿ ನಡೆದ ಘಟನೆ ಅಲ್ಲ ಬದಲಾಗಿ ಇದು ಸ್ಕ್ರಿಪ್ಟೆಡ್ ವೀಡಿಯೊ ಆಗಿದೆ.
ನಿಜಾಂಶವನ್ನು ತಿಳಿಯಲು ನಾವು ಮೊದಲಿಗೆ ವೈರಲ್ ವೀಡಿಯೊದ ಪ್ರಮುಖ ಕೀ-ಫ್ರೇಮ್ಗಳನ್ನು ಗೂಗಲ್ ಲೆನ್ಸ್ ಸಹಾಯದಿಂದ ಹುಡುಕಿದೆವು. ಆಗ ಆಗಸ್ಟ್ 7 ರಂದು ಬಾಂಗ್ಲಾದೇಶದ ಫೇಸ್ಬುಕ್ ಬಳಕೆದಾರ ಎಂಡಿ ಹಸನ್ ಮಿರ್ಜಾ ಎಂಬ ಖಾತೆಯಿಂದ ಹಂಚಿಕೊಂಡ ಇದೇ ವೀಡಿಯೊದ ಪೂರ್ಣ ಆವೃತ್ತಿಯನ್ನು ನಾವು ಕಂಡುಕೊಂಡಿದ್ದೇವೆ.
ಈ ವೀಡಿಯೊ ಸುಮಾರು 2 ನಿಮಿಷ 53 ಸೆಕೆಂಡುಗಳಷ್ಟು ಉದ್ದವಾಗಿದ್ದು, ವೈರಲ್ ವೀಡಿಯೊದಂತೆಯೇ ಅದೇ ದೃಶ್ಯಗಳನ್ನು ಒಳಗೊಂಡಿದೆ. ಆದರೆ, ವೀಡಿಯೊದ ಅಂತಿಮ ಭಾಗವು ಇದನ್ನು ಸ್ಕ್ರಿಪ್ಟ್ ಮಾಡಲಾಗಿದೆ ಎಂದು ಹೇಳುತ್ತದೆ. ವೀಡಿಯೊವನ್ನು ಪೋಸ್ಟ್ ಮಾಡಿದ ಬಳಕೆದಾರರು ವೀಡಿಯೊವನ್ನು ಲೈಕ್ ಮಾಡಿ, ಶೇರ್ ಮಾಡಿ ಮತ್ತು ಕಾಮೆಂಟ್ ಮಾಡಿ ಎಂದು ಜನರನ್ನು ಒತ್ತಾಯಿಸುತ್ತಾರೆ.
ಇದಲ್ಲದೆ, ಎಂಡಿ ಹಸನ್ ಮಿರ್ಜಾ ಅವರ ಫೇಸ್ಬುಕ್ ಪುಟದಲ್ಲಿ ವೈರಲ್ ವೀಡಿಯೊದಲ್ಲಿ ಕಂಡುಬರುವ ಆಪಾದಿತ ಬಸ್ ಕಂಡಕ್ಟರ್ ಮತ್ತು ಆತನನ್ನು ಹೊಡೆಯುತ್ತಿರುವ ವ್ಯಕ್ತಿ ವಿಭಿನ್ನ ಘಟನೆಗಳನ್ನು ಆಧರಿಸಿದ ವೀಡಿಯೊಗಳಲ್ಲಿ ನಟಿಸುತ್ತಿರುವುದನ್ನು ನಾವು ಹಲವಾರು ಇತರ ವೀಡಿಯೊಗಳಲ್ಲಿ ಕಂಡುಕೊಂಡಿದ್ದೇವೆ.
ಹೀಗಾಗಿ ಈ ಎಲ್ಲ ಮಾಹಿತಿಯ ಆಧಾರದ ಮೇಲೆ, ಮಹಿಳೆಯೊಂದಿಗೆ ಬಸ್ ಕಂಡಕ್ಟರ್‌ನ ಅನುಚಿತ ವರ್ತನೆಯ ಹೇಳಿಕೆಯೊಂದಿಗೆ ವೈರಲ್ ಆಗಿರುವ ಈ ವೀಡಿಯೊ ಸ್ಕ್ರಿಪ್ಟ್ ಮಾಡಲಾಗಿದೆ ಎಂದು ನಾವು ಖಚಿತವಾಗಿ ಹೇಳುತ್ತೇವೆ.