ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧದ ಮಧ್ಯೆ ನಡೆಯುತ್ತಿರುವ ಅವ್ಯವಸ್ಥೆಯ ವೀಡಿಯೊವೊಂದು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದೆ. ಇದರಲ್ಲಿ ಜನರು ಪರಸ್ಪರ ಕೂಗಾಡುತ್ತಾ ವಸ್ತುಗಳನ್ನು ಎಸೆಯುತ್ತಿರುವುದನ್ನು ಕಾಣಬಹುದು. ಕೆಲವು ಸಾಮಾಜಿಕ ಮಾಧ್ಯಮ ಬಳಕೆದಾರರು ಈ ವೀಡಿಯೊ ಇಸ್ರೇಲಿ ವಿಮಾನ ನಿಲ್ದಾಣದಿಂದ ಬಂದಿದೆ ಎಂದು ಹೇಳಿಕೊಳ್ಳುತ್ತಿದ್ದಾರೆ, ಅಲ್ಲಿ ಇರಾನಿನ ಕ್ಷಿಪಣಿ ದಾಳಿಯ ಭಯದಿಂದಾಗಿ ಜನರು ದೇಶವನ್ನು ತೊರೆಯಲು ವಿಮಾನ ಟಿಕೆಟ್ಗಳಿಗಾಗಿ ಜಗಳ ಮಾಡುತ್ತಿದ್ದಾರೆ ಎಂದು ಹೇಳುತ್ತಿದ್ದಾರೆ.
ಫೇಸ್ಬುಕ್ ಬಳಕೆದಾರರೊಬ್ಬರು ಈ ವೀಡಿಯೊವನ್ನು ಹಂಚಿಕೊಂಡು, ‘‘ತನಗೆ ತಾನು ಸೂಪರ್ ಪವರ್ ಎಂದು ಬೀಗುತ್ತಿದ್ದ ಯುದ್ಧಪರಾಧಿ ಇಸ್ರೇಲ್ ನ ಪ್ರಜೆಗಳು ದೇಶ ಬಿಟ್ಟು ಒಡಲು ವಿಮಾನ ನಿಲ್ದಾಣದಲ್ಲಿ ಟಿಕೆಟ್ಗಾಗಿ ಹೊಡೆದಾಡಿ ಕೊಳ್ಳುತ್ತಿರುವ ದೃಶ್ಯ.’’ ಎಂದು ಬರೆದುಕೊಂಡಿದ್ದಾರೆ. (Archive)
ಈ ಸುದ್ದಿಯ ಸತ್ಯಾಸತ್ಯತೆಯನ್ನು ಸೌತ್ ಚೆಕ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವೀಡಿಯೊ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. ಇದು ಜುಲೈ 2025 ರ ವೀಡಿಯೊ ಆಗಿದ್ದು, ಆ ಸಮಯದಲ್ಲಿ ಜೆರುಸಲೆಮ್ನ ಸಿನಿಮಾ ಸಿಟಿ ಸಂಕೀರ್ಣದಲ್ಲಿ ಕೆಲವು ಯುವಕರು ಸಿಬ್ಬಂದಿಯೊಂದಿಗೆ ಘರ್ಷಣೆ ನಡೆಸಿದರು.
ನಿಜಾಂಶವನ್ನು ತಿಳಿಯಲು ನಾವು ವೈರಲ್ ವೀಡಿಯೊದ ಪ್ರಮುಖ ಕೀಫ್ರೇಮ್ಗಳನ್ನು ಗೂಗಲ್ ಲೆನ್ಸ್ ಸಹಾಯದಿಂದ ಹುಡುಕಿದಾಗ, pishpeshuk ಎಂಬ ಹೆಸರಿನ Instagram ಖಾತೆಯಲ್ಲಿ ಇದೇ ವೀಡಿಯೊವನ್ನು ಕಂಡುಕೊಂಡಿದ್ದೇವೆ. ಇದನ್ನು ಜುಲೈ 20, 2025 ರಂದು ಪೋಸ್ಟ್ ಮಾಡಲಾಗಿದೆ. ಇದರಿಂದ ಈ ವೀಡಿಯೊ ಇತ್ತೀಚಿನದಲ್ಲ ಮತ್ತು ಪ್ರಸ್ತುತ ಸಂಘರ್ಷಕ್ಕೆ ಸಂಬಂಧಿಸಿಲ್ಲ ಎಂದು ಸೂಚಿಸುತ್ತದೆ.
ವೀಡಿಯೊದ ಶೀರ್ಷಿಕೆಯ ಪ್ರಕಾರ, ಇದು ಜೆರುಸಲೆಮ್ನ ಸಿನಿಮಾ ಸಿಟಿ ಮಾಲ್ನಲ್ಲಿ ಕೆಲವು ಯುವಕರು ಆಹಾರಕ್ಕಾಗಿ ಸಿಬ್ಬಂದಿಗಳೊಂದಿಗೆ ಗಲಾಟೆ ನಡೆಸಿದ್ದಾರೆ.
ವೈರಲ್ ವೀಡಿಯೊವನ್ನು ದಿ ಟೈಮ್ಸ್ ಆಫ್ ಇಂಡಿಯಾದ ಕೂಡ ಜುಲೈ 20, 2025 ರ ವೀಡಿಯೊ ವರದಿಯಲ್ಲಿ ಕಾಣಬಹುದು. ‘‘ಜುಲೈ 19 ರಂದು ಜೆರುಸಲೆಮ್ನ ಸಿನಿಮಾ ಸಿಟಿ ಥಿಯೇಟರ್ ಒಳಗೆ ಅರಬ್ ವಿರೋಧಿ ಗಲಭೆಗಳು ಭುಗಿಲೆದ್ದವು. ಅರಬ್ಬರಿಗೆ ಸಾವು ಎಂಬ ಘೋಷಣೆಗಳ ನಡುವೆ ಯಹೂದಿ ಯುವಕರು ಥಿಯೇಟರ್ ಉದ್ಯೋಗಿಗಳೊಂದಿಗೆ ಘರ್ಷಣೆ ನಡೆಸುತ್ತಿರುವುದು ಕಂಡುಬಂದಿವೆ. ಘಟನೆಗೆ ಸಂಬಂಧಿಸಿದಂತೆ ಯಾವುದೇ ಬಂಧನಗಳನ್ನು ಮಾಡಲಾಗಿಲ್ಲ ಎಂದು ಟೈಮ್ಸ್ ಆಫ್ ಇಸ್ರೇಲ್ ವರದಿ ಮಾಡಿದೆ’’ ಎಂಬ ಮಾಹಿತಿ ಇದರಲ್ಲಿದೆ.
ಈ ಕುರಿತು ಇನ್ನಷ್ಟು ಹುಡುಕಿದಾಗ, ಇದಕ್ಕೆ ಸಂಬಂಧಿಸಿದ ಅನೇಕ ಸುದ್ದಿ ವರದಿಗಳು ನಮಗೆ ಸಿಕ್ಕವು.
ಜುಲೈ 20, 2025 ರಂದು ಪ್ರಕಟಿಸಿದ ದಿ ಜೆರುಸಲೆಮ್ ಪೋಸ್ಟ್ ಪ್ರಕಾರ, ಸಿನಿಮಾ ಸಿಟಿಯಲ್ಲಿ ಕೆಲವು ಯಹೂದಿ ಯುವಕರು ಮತ್ತು ಅರಬ್ ಕೆಫೆಟೇರಿಯಾ ನೌಕರರ ನಡುವೆ ಹಿಂಸಾತ್ಮಕ ಘರ್ಷಣೆ ನಡೆಯಿತು. ಘರ್ಷಣೆಯ ಸಮಯದಲ್ಲಿ, ಆಹಾರ ಕೌಂಟರ್ ಸಿಬ್ಬಂದಿಯ ಮೇಲೆ ವಸ್ತುಗಳನ್ನು ಎಸೆಯಲಾಯಿತು ಮತ್ತು "ಅರಬ್ಬರಿಗೆ ಸಾವು" ನಂತಹ ಘೋಷಣೆಗಳನ್ನು ಕೂಗಲಾಯಿತು. ಪ್ರತಿಕ್ರಿಯೆಯಾಗಿ, ಸಿಬ್ಬಂದಿ ಅವರ ಮೇಲೆ ವಸ್ತುಗಳನ್ನು ಎಸೆದರು. ಕೆಲವು ಉದ್ಯೋಗಿಗಳಿಗೆ ಸಣ್ಣಪುಟ್ಟ ಗಾಯಗಳಾಗಿವೆ.
ಹೀಬ್ರೂ ಭಾಷೆಯಲ್ಲಿ ಪ್ರಕಟವಾದ ಕೆಲವು ವರದಿಗಳ ಪ್ರಕಾರ, ಪಾಪ್ಕಾರ್ನ್ಗಾಗಿ ಜಗಳ ಪ್ರಾರಂಭವಾಯಿತು. ಪೊಲೀಸರು ಬರುವ ಮೊದಲೇ ಯುವಕರು ಸ್ಥಳದಿಂದ ಪರಾರಿಯಾಗಿದ್ದರು.
ಇದರರ್ಥ ವೈರಲ್ ಆಗುತ್ತಿರುವ ವೀಡಿಯೊಗಳಿಗೂ ಪ್ರಸ್ತುತ ಯುದ್ಧಕ್ಕೂ ಯಾವುದೇ ಸಂಬಂಧವಿಲ್ಲ ಎಂಬುದು ಸ್ಪಷ್ಟವಾಗಿದೆ. ಹೀಗಾಗಿ ವೈರಲ್ ಪೋಸ್ಟ್ ಸುಳ್ಳು ಎಂದು ನಾವು ಖಚಿತವಾಗಿ ಹೇಳುತ್ತೇವೆ.