ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿರುವ ವಿಡಿಯೊವೊಂದರಲ್ಲಿ, ಇಬ್ಬರು ಪೊಲೀಸ್ ಸಿಬ್ಬಂದಿಗಳು ಸಿಖ್ ವ್ಯಕ್ತಿಯನ್ನು ಬಂಧಿಸಿ ಆತನ ಪೇಟವನ್ನು ತೆಗೆಯುತ್ತಿರುವುದನ್ನು ಕಾಣಬಹುದು. ಈ ವಿಡಿಯೊ ಜಂತರ್ ಮಂತರ್ನಲ್ಲಿ ನಡೆದ ಸಿಜೆಪಿ ಪ್ರತಿಭಟನೆಯದ್ದು ಎಂದು ಹೇಳಿಕೊಂಡು ಹಂಚಿಕೊಳ್ಳಲಾಗುತ್ತಿದೆ.
ಫೇಸ್ಬುಕ್ ಬಳಕೆದಾರರೊಬ್ಬರು ಈ ವಿಡಿಯೊವನ್ನು ಅಪ್ಲೋಡ್ ಮಾಡಿ, ‘‘ಪ್ರತಿಭಟನೆಯಲ್ಲಿ ಸಿಖ್ ವೇಷ ಧರಿಸಿ, ಸಿಕ್ಕಿಬಿದ್ದ ಇವನ ಹೆಸರು, ನಸೀರ್ ಅಹಮ್ಮದ್. ಕೆಲವೊಮ್ಮೆ ಹಿಂದೂಗಳಂತೆ, ಕೆಲವೊಮ್ಮೆ ಸಿಖ್ಖರಂತೆ ವೇಷ ಧರಿಸಿ ದೇಶದಲ್ಲಿ ಅಶಾಂತಿ, ಆರಾಜಕತೆ ಸೃಷ್ಟಿಸಿ, ಗಲಭೆ ಮಾಡುವುದೇ ಈ ದೇಶದ್ರೋಹಿಗಳ ಕೆಲಸ’’ ಎಂದು ಬರೆದುಕೊಂಡಿದ್ದಾರೆ. (Archive)
ಈ ಸುದ್ದಿಯ ಸತ್ಯಾಸತ್ಯತೆಯನ್ನು ಸೌತ್ ಚೆಕ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವಿಡಿಯೊ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. ಈ ವಿಡಿಯೋ 2011 ರದ್ದಾಗಿದ್ದು, ಸಿಜೆಪಿ ಪ್ರತಿಭಟನೆಗಳಿಗೂ ಇದಕ್ಕೂ ಯಾವುದೇ ಸಂಬಂಧವಿಲ್ಲ.
ನಿಜಾಂಶವನ್ನು ತಿಳಿಯಲು ನಾವು ವೈರಲ್ ವಿಡಿಯೊದ ಪ್ರಮುಖ ಕೀ-ಫ್ರೇಮ್ಗಳನ್ನು ಗೂಗಲ್ ಲೆನ್ಸ್ ಸಹಾಯದಿಂದ ಹುಡುಕಿದಾಗ, ಪೋಸ್ಟ್‌ನಲ್ಲಿರುವ ದೃಶ್ಯಗಳಿಗೆ ಹೋಲುವ ದೃಶ್ಯಗಳನ್ನು ಹೊಂದಿರುವ ಯೂಟ್ಯೂಬ್ ವಿಡಿಯೊ ಸಿಕ್ಕಿತು. ಇದನ್ನು 2011ರ ಮಾರ್ಚ್ 29 ರಂದು ಅಪ್ಲೋಡ್ ಮಾಡಲಾಗಿದೆ. ವೀಡಿಯೊದ ಶೀರ್ಷಿಕೆ "ಪಂಜಾಬ್ ಪೊಲೀಸ್ ಅಧಿಕಾರಿಯಿಂದ ಮೊಹಾಲಿ ಕ್ರೀಡಾಂಗಣದಲ್ಲಿ ಪೇಟದ ಅವಮಾನ (ಸಿಖ್ ಗುರುತನ್ನು)" ಎಂದು ಬರೆಯಲಾಗಿದೆ.
ವೈರಲ್ ವಿಡಿಯೊದ ಸ್ಕ್ರೀನ್ ಶಾಟ್ನೊಂದಿಗೆ ಸಿಖ್ ಮಾಧ್ಯಮ ವೆಬ್‌ಸೈಟ್ sikhnet.com ನಲ್ಲಿ ಲೇಖನ ಪ್ರಕಟ ಆಗಿರುವುದು ಸಿಕ್ಕಿದೆ. ಈ ಘಟನೆ ಮಾರ್ಚ್ 28, 2011 ರಂದು ಮೊಹಾಲಿಯ ಬಳಿಯ ಪಿಸಿಎ ಕ್ರೀಡಾಂಗಣದಲ್ಲಿ ನಡೆದಿದೆ. ವರದಿಯ ಪ್ರಕಾರ, ಲಾಭರಹಿತ ಸಂಸ್ಥೆಯಾದ ಯುನೈಟೆಡ್ ಸಿಖ್ಸ್, ಸಿಖ್ ಯುವಕನ ಪೇಟವನ್ನು ತೆಗೆದಿದ್ದನ್ನು ವಿರೋಧಿಸಿ ಪಂಜಾಬ್ ಪೊಲೀಸರ ವಿರುದ್ಧ ಮೊಹಾಲಿ ಜುಡಿಷಿಯಲ್ ಮ್ಯಾಜಿಸ್ಟ್ರೇಟ್ ಮುಂದೆ ಕ್ರಿಮಿನಲ್ ದೂರು ದಾಖಲಿಸಿದೆ. ಈ ವಿಷಯದಲ್ಲಿ ಅವರು ಆಗಿನ ಪ್ರಧಾನಿ, ಸಿಜೆಐ, ಎನ್‌ಎಚ್‌ಆರ್‌ಸಿ ಸೇರಿದಂತೆ ಇತರರಿಗೆ ಪತ್ರಗಳನ್ನು ಬರೆದಿದ್ದರು.
ಘಟನೆಗೆ ಸಂಬಂಧಿಸಿದ ಸುದ್ದಿ ವರದಿಗಳನ್ನು ನಾವು ಹುಡುಕಿದಾಗ, ಆ ಸಮಯದಲ್ಲಿ ಟೈಮ್ಸ್ ಆಫ್ ಇಂಡಿಯಾ ಮತ್ತು ಇಂಡಿಯನ್ ಎಕ್ಸ್‌ಪ್ರೆಸ್ ಪತ್ರಿಕೆಗಳು ಅದನ್ನು ವರದಿ ಮಾಡಿದ್ದವು ಎಂದು ಕಂಡುಬಂದಿದೆ.
ಈ ವರದಿಗಳ ಪ್ರಕಾರ, ಈ ಘಟನೆಯು ಮೊಹಾಲಿಯ ಪಿಸಿಎ ಕ್ರೀಡಾಂಗಣದ ಬಳಿ ಪ್ರತಿಭಟನಾ ನಿರತ ಗ್ರಾಮೀಣ ಪಶುವೈದ್ಯಕೀಯ ಔಷಧಿಕಾರರು ಮತ್ತು ಪಂಜಾಬ್ ಪೊಲೀಸರ ನಡುವಿನ ಘರ್ಷಣೆಯ ಪರಿಣಾಮವಾಗಿದೆ. ಈ ಪ್ರತಿಭಟನೆ ಮಾರ್ಚ್ 28, 2011 ರಂದು, ಮೊಹಾಲಿ ಕ್ರೀಡಾಂಗಣದಲ್ಲಿ ಭಾರತ ಮತ್ತು ಪಾಕಿಸ್ತಾನ ನಡುವಿನ ಹೈ-ವೋಲ್ಟೇಜ್ ಐಸಿಸಿ ಕ್ರಿಕೆಟ್ ವಿಶ್ವಕಪ್ ಸೆಮಿಫೈನಲ್‌ಗೆ ಕೇವಲ ಎರಡು ದಿನಗಳ ಮೊದಲು ನಡೆಯಿತು.
ದಿ ಇಂಡಿಯನ್ ಎಕ್ಸ್‌ಪ್ರೆಸ್ ಪ್ರಕಾರ, ಮಧ್ಯಾಹ್ನ 12.45 ರ ಸುಮಾರಿಗೆ, ತಮ್ಮ ಸೇವೆಗಳನ್ನು ಪುನಃಸ್ಥಾಪಿಸಲು ಮತ್ತು ಕ್ರಮಬದ್ಧಗೊಳಿಸುವಂತೆ ಕೋರಿ ಈಗಾಗಲೇ ಅನಿರ್ದಿಷ್ಟಾವಧಿ ಪ್ರತಿಭಟನೆಯಲ್ಲಿದ್ದ ನೂರಾರು ವಜಾಗೊಂಡ ಪಶುವೈದ್ಯಕೀಯ ಔಷಧಿಕಾರರು ಕ್ರೀಡಾಂಗಣದ ಕಡೆಗೆ ಮೆರವಣಿಗೆ ನಡೆಸಲು ಪ್ರಾರಂಭಿಸಿದರು. ಹೆಚ್ಚಿನ ಭದ್ರತಾ ವಲಯವನ್ನು ಪ್ರವೇಶಿಸಲು ಪ್ರಯತ್ನಿಸಿದಾಗ ಪೊಲೀಸರು ಗುಂಪನ್ನು ಬಲವಂತವಾಗಿ ಚದುರಿಸಲು ಪ್ರಯತ್ನಿಸಿದರು.
ಮಾರ್ಚ್ 31, 2011 ರಂದು, ಟೈಮ್ಸ್ ಆಫ್ ಇಂಡಿಯಾ ವರದಿಯ ಪ್ರಕಾರ, ಸಿಖ್ ಪ್ರತಿಭಟನಾಕಾರರ ಪೇಟವನ್ನು ತೆಗೆದ ಆರೋಪದ ಮೇಲೆ ಪಂಜಾಬ್ ಪೊಲೀಸ್‌ನ ಇಬ್ಬರು ಗೆಜೆಟೆಡ್ ಅಧಿಕಾರಿಗಳನ್ನು, ಎಸ್‌ಪಿ ಮತ್ತು ಎಸ್‌ಎಚ್‌ಒ ಸೇರಿದಂತೆ ಅಮಾನತುಗೊಳಿಸಲಾಗಿದೆ.
ಹೀಗಾಗಿ ಈ ಎಲ್ಲ ಮಾಹಿತಿಯ ಆಧಾರದ ಮೇಲೆ, ವೈರಲ್ ಆಗಿರುವ ಈ ಹಕ್ಕು ನಕಲಿ. ಈ ವಿಡಿಯೊ 2011 ರದ್ದಾಗಿದ್ದು, ಅಲ್ಲಿ ಪೊಲೀಸರು ಪ್ರತಿಭಟನಾ ನಿರತ ಗ್ರಾಮೀಣ ಔಷಧಿಕಾರರು ಮತ್ತು ನಾಲ್ಕನೇ ದರ್ಜೆಯ ಉದ್ಯೋಗಿಗಳ ಮೇಲೆ ಲಾಠಿ ಚಾರ್ಜ್ ನಡೆಸಿದರು ಮತ್ತು ಸಿಖ್ ಪ್ರತಿಭಟನಾಕಾರರೊಬ್ಬರ ಪೇಟವನ್ನು ಪೊಲೀಸ್ ಅಧಿಕಾರಿಯೊಬ್ಬರು ತೆಗೆದರು.