പ്രധാനമന്ത്രി നരേന്ദ്രമോദിയുടെ 76-ാം ജന്മദിനമായ 2026 സെപ്തംബര്‍ 17 ന് ദുബായിലെ ബുര്‍ജ് ഖലീഫ അലങ്കരിച്ചുവെന്നും ആശംസ സന്ദേശം പ്രദര്‍ശിപ്പിച്ചുവെന്നും സമൂഹമാധ്യമങ്ങളില്‍ പ്രചാരണം. പ്രധാനമന്ത്രിയുടെ ചിത്രവും ആശംസാ സന്ദേശവും ഉള്‍പ്പെടുന്ന വീഡിയോ ബുര്‍ജ് ഖലീഫയില്‍ പ്രദര്‍ശിപ്പിക്കുന്ന ദൃശ്യങ്ങള്‍ സഹിതമാണ് പ്രചാരണം.
പ്രചാരണം തെറ്റിദ്ധരിപ്പിക്കുന്നതാണെന്നും വീഡിയോ 2025-ലേതാണെന്നും അന്വേഷണത്തില്‍ കണ്ടെത്തി.
പ്രചരിക്കുന്ന വീഡിയോയിലെ സ്ക്രീന്‍ഷോട്ടുകള്‍ ഉപയോഗിച്ച് നടത്തിയ റിവേഴ്സ് ഇമേജ് പരിശോധനയില്‍ പ്രസ്തുത വീഡിയോ നിരവധി സമൂഹമാധ്യമ അക്കൗണ്ടുകളില്‍ 2025-ല്‍ പങ്കിട്ടതായി കണ്ടെത്തി. ഇതോടെ വീഡിയോ ഈ വര്‍ഷത്തേതല്ലെന്ന സൂചന ലഭിച്ചു. തുടര്‍ന്ന് ഇത് സ്ഥിരീകരിക്കുന്നതിനായി നടത്തിയ പരിശോധനയില്‍ കേന്ദ്രഗവണ്‍മെന്റിന്റെ മൈ-ജിഒവി പ്ലാറ്റ്ഫോമിന്റെ യൂട്യൂബ് അക്കൗണ്ടില്‍ പ്രസ്തുത വീഡിയോ 2025-ല്‍ പങ്കിട്ടതായി കണ്ടെത്തി.
ഇതോടെ വീഡിയോ ഈ വര്‍ഷത്തേതല്ലെന്നും മോദിയുടെ 75-ാം ജന്മദിനത്തില്‍ 2025 സെപ്തംബര്‍ 17 ലേതാണെന്നും വ്യക്തമായി.
ഇതുമായി ബന്ധപ്പെട്ട വിവിധ മാധ്യമ റിപ്പോര്‍ട്ടുകളും ലഭ്യമായി. ടൈംസ് ഓഫ് ഇന്ത്യ, ഇന്ത്യാടുഡേ തുടങ്ങിയ ദേശീയ മാധ്യമങ്ങളെല്ലാം വീഡിയോയുടെ സ്ക്രീന്‍ഷോട്ട് ഉള്‍പ്പെടെ വാര്‍ത്ത നല്‍കിയിട്ടുണ്ട്.
ഇതോടെ പ്രചാരണം തെറ്റിദ്ധരിപ്പിക്കുന്നതാണെന്നും വീഡിയോ പഴയതാണെന്നും സ്ഥിരീകരിച്ചു.