హైదరాబాద్: అక్టోబరు 28న బీఆర్ఎస్ నాయకుడు మల్లారెడ్డి తన మనవరాలు పవిత్రారెడ్డిని రాఘవరెడ్డికి ఇచ్చి ఘనంగా వివాహ వేడుకలను నిర్వహించారు. హైదరాబాద్ సమీపంలోని శంషాబాద్‌లో జరిగిన ఈ వేడుకకు ముఖ్యమంత్రి రేవంత్ రెడ్డి సహా తెలంగాణ వ్యాప్తంగా ప్రముఖ రాజకీయ ప్రముఖులు పెద్ద ఎత్తున తరలివచ్చారు.
ఈ నేపథ్యంలో నిజామాబాద్ బీజేపీ ఎంపీ అరవింద్ ధర్మపురి, బీఆర్ఎస్ అధినేత కే చంద్రశేఖర్‌రావు మేనల్లుడు బీఆర్ఎస్ నేత సంతోష్ కుమార్, మల్లారెడ్డి తదితరులతో కలిసి నవ వధువులతో వేదిక పంచుకున్నట్లు సోషల్‌ మీడియాలో ఓ చిత్రం చక్కర్లు కొడుతోంది.
యూట్యూబ్ ఛానెల్ ‘ఫెస్టివల్ వ్లాగ్స్ హైదరాబాద్’ ఈ చిత్రాన్ని థంబ్‌నెయిల్‌గా ఉపయోగించి రిసెప్షన్ వీడియోను ప్రచురించింది. ఛానెల్‌కు 6,55,000 మంది ఫాలోవర్లు ఉన్నారు. కొన్ని వేల వ్యూస్ ఈ వీడియో సంపాదించుకుంది.
వైరల్ అవుతున్న వాదనలో ఎలాంటి నిజం లేదు.
వైరల్ అవుతున్న ఫోటోను ఎడిట్ చేశారు. అరవింద్ ధర్మపురి, సంతోష్ కుమార్ మల్లా రెడ్డి మనవరాలు రిసెప్షన్‌కు హాజరు కాగా, వధూవరులకు శుభాకాంక్షలు తెలపడానికి ఇద్దరూ కలిసి వేదికను పంచుకోలేదు.
ఫెస్టివల్ వ్లాగ్స్ హైదరాబాద్ యూట్యూబ్ ఛానల్ లో అప్‌లోడ్ చేసిన వీడియోను మేము నిశితంగా పరిశీలించాము, అయితే అరవింద్ ధర్మపురి, సంతోష్ కుమార్ నూతన వధూవరులతో కలిసి వేదికను పంచుకున్న దృశ్యాలు చూడలేదు.
దాదాపు 3:48 నిమిషాలకు వధూవరులను కలుసుకోవడానికి సంతోష్ కుమార్ వేదికపైకి ఎక్కినట్లు వీడియోలో చూడొచ్చు. అయితే ధర్మపురి అరవింద్ 5:14 నిమిషాల మార్కు తర్వాత వేదికపైకి చేరుకున్నారు. వారిద్దరూ కలిసి ఫోటోషూట్‌లో పాల్గొనడం మనం చూడలేదు. అయితే, వారు కొత్త జంటతో విడివిడిగా పోజులిచ్చిన దృశ్యాలు ఉన్నాయి.
ఎడిట్ చేసిన చిత్రం, అసలు చిత్రానికి సంబంధించిన కీఫ్రేమ్‌లు ఇక్కడ ఉన్నాయి.
సంతోష్ కుమార్ ఫోటోగ్రాఫ్ కోసం పోజులిచ్చిన కీఫ్రేమ్ 4:11 నిమిషాల మార్క్ వద్ద చూడొచ్చు. ఈ ఫ్రేమ్‌లో అదే పూలకు సంబంధించిన బ్యాగ్రౌండ్, చేతులు, వేళ్లు ఉన్న స్థానాలు, అలాగే కుమార్, మల్లా రెడ్డిల ముఖ కవళికలను సరిపోల్చి చూశాం.
అరవింద్ ధర్మపురి నూతన వధూవరులతో పోజులిచ్చిన కీఫ్రేమ్ 5:30 నిమిషాల మార్క్ వద్ద కనిపించింది.
ఈ ఫ్రేమ్ లో వ్యక్తుల వెనుక ఉన్న సోఫాను కూడా చూడొచ్చు. ముఖ్యంగా, వధువు ఎడమ చేయి పైకి లేపి ఉంచారు. వరుడు, ధర్మపురి అరవింద్ తో సహా అందరు వ్యక్తుల చేతులు ఉన్న స్థానం ఎడిట్ చేసిన చిత్రానికి సమానంగా ఉంటుంది. అదనంగా, నలుగురు వ్యక్తుల తలలు, చిరునవ్వులు ఒకేలా ఉంటాయి.
కాబట్టి, అరవింద్ ధర్మపురి, సంతోష్ కుమార్ నూతన వధూవరులతో కలిసి పోజులిచ్చినట్లు చూపుతున్న వైరల్ చిత్రం ఎడిట్ చేశారని మేము నిర్ధారించాము. వివాహ రిసెప్షన్ వీడియోలో వారు ఏ సమయంలోనూ వేదికను పంచుకున్నట్లు మాకు ఎలాంటి రుజువులు కనిపించలేదు.