‘ಹರೇ ರಾಮ ಹರೇ ಕೃಷ್ಣ' ಎಂದು ಸಾವಿರಾರು ಜನರು ಘೋಷಣೆ ಕೂಗುತ್ತಿರುವ ರ್ಯಾಲಿಯ ವೀಡಿಯೊ ಒಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ವೀಡಿಯೊಕ್ಕೆ ಸಂಬಂಧಿಸಿದಂತೆ, ಅಮೆರಿಕಾದಲ್ಲಿ 7 ಲಕ್ಷ ಕ್ರಿಶ್ಚಿಯನ್ನರು ಏಕಕಾಲದಲ್ಲಿ ಹಿಂದೂ ಧರ್ಮಕ್ಕೆ ಮತಾಂತರಗೊಂಡಿದ್ದಾರೆ ಎಂದು ಹೇಳಲಾಗಿದೆ.

ಫೇಸ್​ಬುಕ್ ಬಳಕೆದಾರರೊಬ್ಬರು ಈ ವೀಡಿಯೊವನ್ನು ಹಂಚಿಕೊಂಡು, ‘‘ಅಮೇರಿಕಾದಲ್ಲಿ ಏಳು ಲಕ್ಷ ಜನ ಕ್ರೈಸ್ತ ಮತವನ್ನು ತ್ಯಜಿಸಿ ಮೂಲ ಧರ್ಮವಾದ ಸನಾತನ ಹಿಂದೂ ಧರ್ಮಕ್ಕೆ ಸೇರ್ಪಡೆಯಾದರು. ಒಂದೇ ಭೂಮಿ, ಒಂದೇ ಧರ್ಮ ಸಕಲ ಜೀವ ರಾಶಿಗಳ ಸಂತುಷ್ಟಕ್ಕೆ  ಅದುವೇ ಸನಾತನ ಧರ್ಮ. ಓಂ ನಮೋ ನಾರಾಯಣಾಯ’’ ಎಂದು ಬರೆದುಕೊಂಡಿದ್ದಾರೆ.

ಇದೇ ರೀತಿಯ ಹೇಳಿಕೆಯೊಂದಿಗೆ ವೈರಲ್ ಆಗುತ್ತಿರುವ ಪೋಸ್ಟ್‌ಗಳನ್ನು ನೀವು ಇಲ್ಲಿ, ಇಲ್ಲಿ ನೋಡಬಹುದು.

Fact Check:

ಈ ಸುದ್ದಿಯ ಸತ್ಯಾಸತ್ಯತೆಯನ್ನು ಸೌತ್ ಚೆಕ್ ಪರಿಶೋದಿಸಿದಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವೀಡಿಯೊ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. ಅಮೆರಿಕಾದಲ್ಲಿ 7 ಲಕ್ಷ ಕ್ರಿಶ್ಚಿಯನ್ನರು ಹಿಂದೂ ಧರ್ಮಕ್ಕೆ ಮತಾಂತರಗೊಂಡಿದ್ದಾರೆ ಎಂಬುದನ್ನು ಈ ವೀಡಿಯೊ ತೋರಿಸುತ್ತಿಲ್ಲ. ಬದಲಾಗಿ ಇದು ಲಂಡನ್​ನಲ್ಲಿ ನಡೆದ ಇಸ್ಕಾನ್ ರಥಯಾತ್ರೆಯ ವೀಡಿಯೊ ಆಗಿದೆ.

ನಿಜಾಂಶವನ್ನು ತಿಳಿಯಲು ನಾವು ವಿವಿಧ ಕೀವರ್ಡ್ ಸರ್ಚ್ ಗಳನ್ನು ಬಳಸಿ ಗೂಗಲ್​ನಲ್ಲಿ ಹುಡುಕಿದ್ದೇವೆ. 7 ಲಕ್ಷ ಕ್ರಿಶ್ಚಿಯನ್ ಅಮೆರಿಕನ್ನರು ಹಿಂದೂ ಧರ್ಮಕ್ಕೆ ಮತಾಂತರಗೊಂಡಿದ್ದಾರೆ ಎಂದಾದರೆ ಅದು ದೊಡ್ಡ ಮಟ್ಟದಲ್ಲಿ ಸುದ್ದಿಯಾಗಿರುತ್ತಿತ್ತು. ಆದರೆ, ಈ ಬಗ್ಗೆ ಯಾವುದೇ ಸುದ್ದಿ ಕಂಡುಬಂದಿಲ್ಲ.

ಬಳಿಕ ವೀಡಿಯೊದಲ್ಲಿನ ಕೀಫ್ರೇಮ್‌ ಮೂಲಕ ರಿವರ್ಸ್ ಇಮೇಜ್ ಸರ್ಚ್ ಮಾಡಿದ್ದೇವೆ. ಆಗ ಜುಲೈ 22, 2024 ರಂದು ಅಪ್‌ಲೋಡ್ Krishna of Vrindavan ಎಂಬ ಯೂಟ್ಯೂಬ್ ಚಾನೆಲ್​ನಲ್ಲಿ ಇದೇ ರೀತಿ ಕಾಣುವ ವೀಡಿಯೊವನ್ನು ಕಂಡುಕೊಂಡಿದ್ದೇವೆ. ಈ ವೀಡಿಯೊಕ್ಕೆ ‘‘ಲಂಡನ್ ರಥ ಯಾತ್ರೆ 2024 #ಲಂಡನ್ #ಹರೇಕೃಷ್ಣ #ಫೆಸ್ಟಿವಲ್ #ISKCONLONDON #BRINDAVAN #PURI’’ ಎಂದು ಶೀರ್ಷಿಕೆ ನೀಡಲಾಗಿದೆ.

ರ್ಯಾಲಿಯಲ್ಲಿ ಜನರು ಸಂಗೀತ- ವಾದ್ಯಗಳನ್ನು ಬಾರಿಸುತ್ತಾ ಹಾಡುಗಳನ್ನು ಹಾಡುತ್ತಾ ಸಾಗುತ್ತಿರುವುದನ್ನು ಕಾಣಬಹುದು. ಈ ಮಾಹಿತಿಯ ಆಧಾರದ ಮೇಲೆ ನಾವು ಕೀವರ್ಡ್ ಹುಡುಕಾಟವನ್ನು ಮಾಡಿದ್ದೇವೆ. ಆಗ ಯೂಟ್ಯೂಬ್​ನಲ್ಲಿ ‘‘ಲಂಡನ್ ರಥ ಯಾತ್ರೆ 2023’’ ಎಂಬ ಶೀರ್ಷಿಕೆಯೊಂದಿಗೆ ಜುಲೈ 31, 2023 ರಂದು ಅಪ್‌ಲೋಡ್ ಮಾಡಲಾದ ವೀಡಿಯೊ ಸಿಕ್ಕಿದೆ.

ಈ ವೀಡಿಯೊದಲ್ಲಿ, ಜನರು ಹಾಡುಗಳನ್ನು ಹಾಡುತ್ತಾ, ವಾದ್ಯಗಳನ್ನು ಬಾರಿಸುತ್ತಾ ಮತ್ತು ಘೋಷಣೆಗಳನ್ನು ಕೂಗುತ್ತಾ ರ್ಯಾಲಿಯಲ್ಲಿ ಭಾಗವಹಿಸುವುದನ್ನು ಕಾಣಬಹುದು. ಈ ಯೂಟ್ಯೂಬ್ ವೀಡಿಯೊದ ಕೀಫ್ರೇಮ್‌ಗಳನ್ನು ಪರಿಶೀಲಿಸಿದ ನಂತರ, ವೈರಲ್ ವೀಡಿಯೊವನ್ನು ಅದೇ ಜಾಗದಲ್ಲಿ ಚಿತ್ರೀಕರಿಸಲಾಗಿದೆ ಎಂದು ನಾವು ಕಂಡುಕೊಂಡಿದ್ದೇವೆ. ಎರಡು ವೀಡಿಯೊಗಳಲ್ಲಿನ ಕಟ್ಟಡಗಳ ಹೋಲಿಕೆಯನ್ನು ಕೆಳಗಿನ ಚಿತ್ರದಲ್ಲಿ ಕಾಣಬಹುದು.

ಈ ಯೂಟ್ಯೂಬ್ ವೀಡಿಯೊದ 37:59 ಟೈಮ್‌ಸ್ಟ್ಯಾಂಪ್‌ನಲ್ಲಿ ನಾವು ಚೌಕಾಕಾರದ ರಥವನ್ನು ಕಾಣಬಹುದು. ವೈರಲ್ ವೀಡಿಯೋದಲ್ಲಿಯೂ ಇದೇ ರಥ ಕಾಣಿಸುತ್ತಿದೆ. ಎರಡೂ ವೀಡಿಯೊಗಳಿಂದ ಕೀಫ್ರೇಮ್‌ಗಳ ಒಂದೇ ರೀತಿಯ ಫೋಟೋವನ್ನು ಕೆಳಗೆ ನೋಡಬಹುದು.

ಹಾಗೆಯೆ ನಾವು ಕಳೆದ ಜುಲೈನಲ್ಲಿ ನಡೆದ ಲಂಡನ್ ರಥ ಯಾತ್ರೆ 2024 ರ ವೀಡಿಯೊ ಕೂಡ ಯೂಟ್ಯೂಬ್​ನಲ್ಲಿ ಕಂಡುಕೊಂಡಿದ್ದೇವೆ. 2023, 2022 ಮತ್ತು 2013 ರಲ್ಲಿ UK ನಲ್ಲಿ ಇದೇ ರೀತಿಯ ರಥ ಯಾತ್ರೆ ರ್ಯಾಲಿಗಳನ್ನು ತೋರಿಸುವ ಯೂಟ್ಯೂಬ್ ವೀಡಿಯೊಗಳನ್ನು ಕೂಡ ನಮಗೆ ಸಿಕ್ಕಿದೆ. ಇಸ್ಕಾನ್ ಪ್ರತಿ ವರ್ಷ ಲಂಡನ್ ರಥಯಾತ್ರೆಯನ್ನು ಆಯೋಜಿಸುತ್ತದೆ. ಈ ವೈರಲ್ ವೀಡಿಯೊ ಲಂಡನ್‌ನಲ್ಲಿ ಇಸ್ಕಾನ್ ಆಯೋಜಿಸಿದ್ದ ರಥಯಾತ್ರೆ ಉತ್ಸವಕ್ಕೂ ಸಂಬಂಧಿಸಿದೆ.

ಈ ಎಲ್ಲ ಆಧಾರದ ಮೇಲೆ ವೈರಲ್ ವೀಡಿಯೊ ಅಮೆರಿಕದಲ್ಲಿ ಸಂಭವಿಸಿಲ್ಲ, ಇದು ಯುಕೆಯ ವಾರ್ಷಿಕ ರಥಯಾತ್ರೆಯದ್ದಾಗಿದೆ ಎಂದು ನಾವು ಸ್ಪಷ್ಟಪಡಿಸುತ್ತೇವೆ. 7 ಲಕ್ಷ ಕ್ರಿಶ್ಚಿಯನ್ ಅಮೆರಿಕನ್ನರು ಹಿಂದೂ ಧರ್ಮಕ್ಕೆ ಮತಾಂತರಗೊಂಡಿದ್ದಾರೆ ಎಂಬ ಹೇಳಿಕೆಗೆ ಯಾವುದೇ ಪುರಾವೆಗಳಿಲ್ಲ. ವೈರಲ್ ಹಕ್ಕುಗಳು ಸುಳ್ಳು ಎಂದು ಸೌತ್ ಚೆಕ್ ಕಂಡುಕೊಂಡಿದೆ.