தமிழக வெற்றிக் கழகத் தலைவரும், தமிழக முதல்வருமான விஜய் காங்கிரஸ் உடனான உறவை முறித்துக்கொண்டு, பாஜக தலைமையிலான தேசிய ஜனநாயகக் கூட்டணியில் (NDA) இணைய முடிவு செய்துள்ளதாக ஒரு காணொலி சமூக வலைதளங்களில் வைரலாகப் பகிரப்பட்டு வருகிறது.

Fact Check:

சவுத்செக்கின் ஆய்வில் வைரலாகும் தகவல் தவறாக திரிக்கப்பட்டு பகிரப்பட்டு வருகிறது என்று தெரியவந்தது.

வைரலாகும் இந்தக் கூற்று தொடர்பாக சவுத்செக் உண்மைக் கண்டறியும் குழு விரிவான ஆய்வை மேற்கொண்டது. வைரலான காணொலியில் முதல்வர் விஜய் பேசியதன் உண்மைப் பதிவை ஆய்வு செய்தபோது, அவர் மிசா சட்டம், சர்க்காரியா ஆணையம் மற்றும் வீராணம் விவகாரம் குறித்துப் பேசி திமுகவை மட்டுமே விமர்சித்துக் கொண்டிருந்தார். இதனை ANI உள்ளிட்ட ஊடகங்களும் செய்தியாக வெளியிட்டுள்ளது.

தமிழக சட்டமன்றத்தின் அதிகாரப்பூர்வ யூடியூப் தளத்தில் பதிவேற்றப்பட்ட செப்டம்பர் 7 உரையின் முழுப் பதிவை ஆய்வு செய்ததிலும், பவன் கல்யாண், பிரதமர் நரேந்திர மோடி அல்லது தேசிய ஜனநாயகக் கூட்டணி குறித்து விஜய் எந்தவொரு கருத்தும் தெரிவிக்கவில்லை என்பது உறுதியானது. அவர் முழுக்க முழுக்க காவல்துறை மானியக் கோரிக்கை மீதான விவாதத்திற்குப் பதிலளித்து மட்டுமே உரையாற்றினார்.

மேலும், ஊடக அறிக்கைகள் மற்றும் தவெகவின் அதிகாரப்பூர்வ அறிவிப்புகளின்படி, விஜய் தலைமையில் காங்கிரஸ், விசிக, மதிமுக மற்றும் இந்திய யூனியன் முஸ்லீம் லீக் ஆகிய கட்சிகளை உள்ளடக்கிய மதச்சார்பற்ற சமூகநீதி வெற்றிக் கூட்டணி அமைக்கப்பட்டிருந்ததே தவிர, என்.டி.ஏ கூட்டணியில் இணையும் எந்த முடிவும் எடுக்கப்படவில்லை.

Conclusion:

தமிழக சட்டமன்றத்தில் திமுகவை விமர்சித்து முதல்வர் விஜய் ஆற்றிய வழக்கமான அரசியல் உரையை எடுத்துக்கொண்டு, அவர் என்.டி.ஏ கூட்டணியில் இணையப் போவதாகப் பேசியதாகக் கூறி தவறான உரையுடன் போலித் தகவல் பரப்பப்பட்டு வருகிறது என்பது சவுத்செக் உண்மை சரிபார்ப்பில் தெளிவாக உறுதி செய்யப்பட்டுள்ளது.