ಜುಲೈ 17, 2025 ರಂದು ವೈದ್ಯಕೀಯ ಪೆರೋಲ್ ಮೇಲೆ ಹೊರಬಂದಿದ್ದಾಗ ಪಾಟ್ನಾದ ಪರಾಸ್ ಆಸ್ಪತ್ರೆಯ ಐಸಿಯು ಒಳಗೆ ಗ್ಯಾಂಗ್‌ಸ್ಟರ್ ಚಂದನ್ ಮಿಶ್ರಾ ಅವರನ್ನು ಗುಂಡಿಕ್ಕಿ ಕೊಲ್ಲಲಾಯಿತು. ಈ ಪ್ರಮುಖ ಹತ್ಯೆಯು ಬಿಹಾರದ ಕಾನೂನು ಮತ್ತು ಸುವ್ಯವಸ್ಥೆಯ ಸ್ಥಿತಿಯ ಬಗ್ಗೆ ವ್ಯಾಪಕ ಸಾರ್ವಜನಿಕ ಮತ್ತು ರಾಜಕೀಯ ಆಕ್ರೋಶಕ್ಕೆ ಕಾರಣವಾಯಿತು. ತನಿಖೆ ಮುಂದುವರೆದಂತೆ, ಕೋಲ್ಕತ್ತಾ ಪೊಲೀಸರೊಂದಿಗೆ ಜಂಟಿ ಕಾರ್ಯಾಚರಣೆಯಲ್ಲಿ ಪ್ರಮುಖ ಶಂಕಿತ ತೌಸೀಫ್ ಸೇರಿದಂತೆ ಎಂಟು ಆರೋಪಿಗಳನ್ನು ಪೊಲೀಸರು ಬಂಧಿಸಿದರು. ನಂತರ ಇಬ್ಬರು ಶಂಕಿತರನ್ನು ಎನ್‌ಕೌಂಟರ್‌ನಲ್ಲಿ ಗಾಯಗೊಳಿಸಲಾಯಿತು ಮತ್ತು ಸೆರೆಹಿಡಿಯಲಾಯಿತು. ಉಳಿದ ದಾಳಿಕೋರರಿಗಾಗಿ ಹುಡುಕಾಟ ಮುಂದುವರೆದಿದೆ.
ಈ ಹಿನ್ನೆಲೆಯಲ್ಲಿ, ಚಂದನ್ ಮಿಶ್ರಾ ಹತ್ಯೆಯ ಆರೋಪಿಗಳನ್ನು ಬಿಹಾರ ಪೊಲೀಸರು ಮೆರವಣಿಗೆ ಮಾಡಿದ್ದಾರೆ ಎಂಬ ಹೇಳಿಕೆಯೊಂದಿಗೆ ವೀಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ. (Archive)
ಈ ಸುದ್ದಿಯ ಸತ್ಯಾಸತ್ಯತೆಯನ್ನು ಸೌತ್ ಚೆಕ್ ಪರಿಶೋದಿಸಿಸಾಗ ಸುಳ್ಳು ಹೇಳಿಕೆಯೊಂದಿಗೆ ಈ ವೀಡಿಯೊ ವೈರಲ್ ಆಗುತ್ತಿದೆ ಎಂಬುದು ಕಂಡುಬಂದಿದೆ. ಈ ವೀಡಿಯೊಗೂ ಬಿಹಾರಕ್ಕೂ ಯಾವುದೇ ಸಂಬಂಧವಿಲ್ಲ, ಇದು ರಾಜಸ್ಥಾನದಲ್ಲಿ ನಡೆದ ಘಟನೆಯಾಗಿದ್ದು, ಜೂನ್ 2025 ರಲ್ಲಿ ಮದ್ಯ ಗುತ್ತಿಗೆದಾರನ ಹಂತಕರನ್ನು ಮೆರವಣಿಗೆ ಮಾಡಲಾಯಿತು.
ನಿಜಾಂಶವನ್ನು ತಿಳಿಯಲು ನಾವು ವೈರಲ್ ವೀಡಿಯೊದ ಪ್ರಮುಖ ಚೌಕಟ್ಟುಗಳನ್ನು ಗೂಗಲ್ ಲೆನ್ಸ್ ಸಹಾಯದಿಂದ ಹುಡುಕಿದಾಗ, ಈ ಮೆರವಣಿಗೆಯ ದೀರ್ಘ ಆವೃತ್ತಿಯನ್ನು ನಾವು ಕಂಡುಕೊಂಡೆವು. ಇದನ್ನು ಜೂನ್ 30 ರಂದು BD News Bansur Darpan Rajasthan ಯೂಟ್ಯೂಬ್ ಚಾನೆಲ್ ಹಂಚಿಕೊಂಡಿದೆ. ವೀಡಿಯೊದ ವಿವರಣೆಯ ಪ್ರಕಾರ, ಇದು ಬನ್ಸೂರ್ ಪ್ರದೇಶದ ವೀಡಿಯೊವಾಗಿದ್ದು, ಅಲ್ಲಿ ಸುನಿಲ್ ಅಲಿಯಾಸ್ ತುಲ್ಲಿ ಕೊಲೆ ಪ್ರಕರಣದ ಆರೋಪಿಗಳ ಮೆರವಣಿಗೆಯನ್ನು ಮಾಡಲಾಯಿತು. ಬನ್ಸೂರ್ ರಾಜಸ್ಥಾನದ ಕೋಟ್‌ಪುಟ್ಲಿ ಬೆಹ್ರೋರ್ ಜಿಲ್ಲೆಯ ಒಂದು ಪ್ರದೇಶವಾಗಿದೆ.
ಇದಾದ ನಂತರ, ಇದಕ್ಕೆ ಸಂಬಂಧಿಸಿದ ಕೆಲವು ಸುದ್ದಿಗಳು ನಮಗೆ ಸಿಕ್ಕವು. ಜುಲೈ 1 ರಂದು ಆಜ್ ತಕ್ ಮಾಡಿದ ವರದಿಯಲ್ಲಿ, ಜೂನ್ 24 ರಂದು ರಾಜಸ್ಥಾನದ ಕೋಟ್‌ಪುಟ್ಲಿ ಜಿಲ್ಲೆಯಲ್ಲಿ ಮದ್ಯ ಗುತ್ತಿಗೆದಾರ ಸುನಿಲ್ ಅವರ ಹತ್ಯೆಯ ಬಗ್ಗೆ ವಿವರವಾದ ವೈರಲ್ ಕ್ಲಿಪ್‌ನ ತುಣುಕನ್ನು ಒಳಗೊಂಡಂತೆ ಪೊಲೀಸರು ನಾಲ್ವರು ಆರೋಪಿಗಳನ್ನು ಬೀದಿಗಳಲ್ಲಿ ಮೆರವಣಿಗೆ ಮಾಡುತ್ತಿರುವ ವೀಡಿಯೊವನ್ನು ಹೊಂದಿತ್ತು.
ಎನ್‌ಕೌಂಟರ್ ನಂತರ ಪೊಲೀಸರು ನಾಲ್ವರು ಆರೋಪಿಗಳನ್ನು ಬಂಧಿಸಿದರು, ಆದರೆ ಮಾಸ್ಟರ್ ಮೈಂಡ್ ಕೃಷ್ಣ ಪೆಹಲ್ವಾನ್ ಇನ್ನೂ ತಲೆಮರೆಸಿಕೊಂಡಿದ್ದಾನೆ. ಆರೋಪಿಗಳು ಪೊಲೀಸ್ ಸಿಬ್ಬಂದಿ ಮೇಲೆ ದಾಳಿ ಮಾಡಿದ್ದಾರೆ ಮತ್ತು ಪ್ರತಿಯಾಗಿ ಗುಂಡು ಹಾರಿಸಿದ್ದಾರೆ ಎಂದು ವರದಿಯಾಗಿದೆ. ಅವರಿಗೆ ಚಿಕಿತ್ಸೆ ನೀಡಿದ ನಂತರ, ಅವರನ್ನು ಬೀದಿಗಳಲ್ಲಿ ಮೆರವಣಿಗೆ ಮಾಡಲಾಯಿತು ಎಂದು ವರದಿ ತಿಳಿಸಿದೆ.
‘‘ಜೂನ್ 27 ರಂದು, ಈ ಪ್ರಕರಣದ ನಾಲ್ವರು ಆರೋಪಿಗಳನ್ನು ಬಂಧಿಸಲು ಪೊಲೀಸರು ಹರ್ಸೌರಾ ಪ್ರದೇಶವನ್ನು ತಲುಪಿದರು. ಪೊಲೀಸರು ಈ ಜನರನ್ನು ಸುತ್ತುವರೆದಾಗ, ಅವರು ಪೊಲೀಸರ ಮೇಲೆ ಗುಂಡು ಹಾರಿಸಲು ಪ್ರಾರಂಭಿಸಿದರು. ಪೊಲೀಸರು ಮತ್ತು ಆರೋಪಿಗಳ ನಡುವೆ ಗುಂಡಿನ ಚಕಮಕಿ ನಡೆದು, ನಾಲ್ವರು ಆರೋಪಿಗಳು ಗಾಯಗೊಂಡರು. ಇದಆದ ನಂತರ, ಪೊಲೀಸರು ಈ ಗಾಯಗೊಂಡ ಆರೋಪಿಗಳನ್ನು ಬನ್ಸೂರ್‌ನಲ್ಲಿಯೇ ಮೆರವಣಿಗೆ ಮಾಡಿದರು’’ ಎಂದು ಈಟಿವಿ ಭಾರತ್ ವರದಿ ಮಾಡಿದೆ.
ಹೀಗಾಗಿ ಈ ಎಲ್ಲ ಮಾಹಿತಿಯ ಆಧಾರದ ಮೇಲೆ, ರಾಜಸ್ಥಾನದಲ್ಲಿ ನಡೆದ ಗುಂಡಿನ ದಾಳಿ ಪ್ರಕರಣವೊಂದರಲ್ಲಿ ಕೊಲೆ ಆರೋಪಿಗಳನ್ನು ಮೆರವಣಿಗೆ ಮಾಡಿದ ವೀಡಿಯೊವನ್ನು ಬಿಹಾರದ ಚಂದನ್ ಮಿಶ್ರಾ ಆಸ್ಪತ್ರೆಯಲ್ಲಿ ನಡೆದ ಗುಂಡಿನ ದಾಳಿಗೆ ಸಂಬಂಧಿಸಿದಂತೆ ತಪ್ಪಾಗಿ ಹಂಚಿಕೊಳ್ಳಲಾಗಿದೆ ಎಂದು ನಾವು ಖಚಿತವಾಗಿ ಹೇಳುತ್ತೇವೆ.